Кайрымдуу бол!

    8-февралда университеттин «Саламат-жаштар деми» коомдук бирикмесинин мүчөлөрү «Кайрымдуу бол!» аттуу тамак-аш жарманкесин өткөрүштү.

Жарманке ден-соолугунан мүмкүнчүлүгү чектелген 4 жаштагы Нуриман аттуу жаш баланын Түркия мамлекетинде жасала турган операциясына жардам берүү максатында уюштурулган.

«Саламат-жаштар деми» коомдук бирикмесинин башчысы, жарманкенин башкы демилгечиси Жаныбек Даменов жарманке тууралуу буларга токтолду. «Бул жарманкени уюштуруп жатканыбыздын себеби, 4 жаштагы Нуриман аттуу инибиз сөөк грыжасынан жабыркап, операция жасоого жергиликтүү медицинанын дарамети жетпегендиктен, ата-энеси алыскы Түркия мамлекетинде операция жасатууга толук мүмкүнчүлүк бар экенин айтышкан. Ал жакта операция чоң сумманы талап кылгандыктан, биздин коомдук бирикме аз болсо да жардам көрсөтөлү деген максатта бүгүнкү жарманкени уюштуруп жатат. Бардык студенттерди бул иш-чарага активдүү катышып, өз салымыңыздарды кошуңуздар демекчибиз», – деди уюштуруучу Ж.Даменов.

Университеттин студенттери иш-чарага активдүү катышып, уюштуруучуларга чоң колдоо көрсөтүштү. Соңунда чогулган каражат Нуримандын жакындарына тапшырылды.